اشعار ترکی برای عید

ابیاتی از استاد شهریار

 

بایرامیدی گئجه قوشی اوخوردی        

آداخلی قیز بیک جورابین توخوردی

هر کس شالین بیر باجادان سوخوردی

             آی نه گؤزل قایدادی شال ساللاماق

             بیک شالینا بایراملغین باغلاماق

*****************************

شال ایسته دیم منده ائوده آغلادیم     

بیر شال آلیب تئز بئلیمه باغلادیم

غلام گیله قاشدیم شالی ساللادیم

            فاطما خالا منه جوراب باغلادی

            خان ننه می یادا سالیب آغلادی

*****************************

بایرام اولوب قیزیل پالچیق ازللر         

ناقیش ووروب اتاقلاری بزللر

طاخجالارا دوزمه لری دوزللر

            قیز-گلینین فندقچاسی حناسی

            هوسلنر آناسی قایناناسی

*****************************

یومورتانی گؤیچک گلّی بویاردیق      

جاقّیشدریب سینانلارین سویاردیق

اویناماقدان بیرجه مگر دویاردیق

            علی منه یاشیل آشیق وئرردی

            ارضا منه نوروز گلی درردی

و شعری طنز از معجز شبستری

سنی تاری بایرام خانیم                     راضی اولما من اوتانیم
بایرام دا یوخدور تومانیم                         گئت تبریزه ، گلمه بیزه
==========

من ده یوخ حوصله بایرام !                    الیم بوشدور هله بایرام !


شیل اولاسان بئله بایرام                        گئت تبریزه ، گلمه بیزه
==========
بایرام اگر گلسن بیزه                               بیر شال گتیر قارا قیزه

گتیرمه سن ، گت تبریزه                         گلمه بیزه ،  گلمه بیزه
==========
گلسن بیزه آغام جانی                         باشین یاررام ، آخار قانی

اوغلانین یوخدور تومانی                        گئت تبریزه ، گلمه بیزه
==========
گؤرسن آخیر چرشنبه نی                 سؤیله اینجتمه سین منی

پلووون یوخ یاغی – دنی                        گئت تبریزه ، گلمه بیزه
==========
ساققیزی سالمیشام انگه                    اوغلان گتدی منی تنگه

پول یوخدور وئرم فیشنگه                     گئت تبریزه ، گلمه بیزه
==========
بایرام ! واللاه یوخدور ناریم                   یاری گورمه یه آپاریم

نار وئرمه سم ، کوسر یاریم                   گئت تبریزه ، گلمه بیزه
==========
وارلی یئییر یاغلی چیلوو               یوخسول چکر ، غصه – خینوو

بیزده یوخدور ، خوروز پیلوو                  گئت تبریزه ، گلمه بیزه
==========
یوخسول مین درده توش اولار      منی ایچمه دن سرخوش اولار


تبریز حالواسی خوش اولار              گئت تبریزه ، گلمه بیزه منبع شعر معجزhttp://www.e-pedian.com/literry/

 

/ 0 نظر / 458 بازدید